Bitaraplyk baky bagta binýatdyr,

Parahatlyk saýlan ýoluňdyr, Watan!

Goýnuňda ýazylan taryh zerbapdyr,

Dünýä şugla saçýan nuruňdyr, Watan!

Garaşsyzlyk — kalba ganat, galkynyş,

Jebis halka döwlet bermiş, ýalkamyş,

Beýik işler bilen ýurtda özgeriş,

Mesgenim, mertebäm, barymdyr Watan!

Halk ykbalyn alyp arka — gerdene,

Ýaşamagyň özem belent mertebe,

Ýaşlaryň dogmundan nurly erteler,

Mert nesiller şöhrat-şanyňdyr, Watan!

Parahatlyk — dünýä içre ýaýdygyň,

Agzybirli — baş şygaryň, aýdymyň,

Bagty buşlap parlar ýaşyl Baýdagyň,

Ajap mekan seniň törüňdir, Watan!

Ýaňlanyp dur dost-doganlyk owazy,

Sowulmaz döwrany, bahary-ýazy,

Namalar aýdylsyn, çalynsyn sazy,

Şatlykly, şowhunly toýlaryň, Watan!